ਹਰ ਚੌਮਾਹੀ ਪੰਜਾਬੀ ਦੇ ਮਹਿਬੂਬ ਲੇਖਕਾਂ ਦਾ ਸਨਮਾਨ ਕੀਤਾ ਜਾਏਗਾ : ਇੰਦਰਜੀਤ ਪੁਰੇਵਾਲ
ਚੰਡੀਗੜ੍ਹ, 9 ਅਪਰੈਲ, (ਹਰਦੇਵ ਚੌਹਾਨ)
ਸਾਹਿਤਕ ਰਸਾਲੇ 'ਰਾਗ' ਦੇ ਮਾਲਕਾਂ ਵੱਲੋਂ ਪੰਜਾਬ ਕਲਾ ਪਰਿਸ਼ਦ ਚੰਡੀਗੜ੍ਹ ਦੇ ਸਹਿਯੋਗ ਨਾਲ ਇਥੇ ਕਲਾ ਭਵਨ ਚੰਡੀਗੜ੍ਹ ਵਿਖੇ ਸਾਹਿਤਕ ਸਨਮਾਨ ਸਮਾਰੋਹ ਕਰਵਾਇਆ ਗਿਆ। ਰਾਗ ਕਾਫਲਾ ਦੇ ਸਰਪ੍ਰਸਤ ਹਰਵਿੰਦਰ ਨੇ ਮਹਿਮਾਨਾਂ ਨੂੰ ਜੀਓ ਆਇਆ ਆਖਿਆ ।
ਅਮਰੀਕਾ ਤੋਂ ਆਏ 'ਰਾਗ' ਦੇ ਸੰਚਾਲਕ ਇੰਦਰਜੀਤ ਪੁਰੇਵਾਲ ਨੇ ਪੁਰਸਕਾਰ ਦੀ ਮਹੱਤਤਾ ਤੇ ਸਾਹਿਤਕ ਰਸਾਲੇ ਰਾਗ ਦੇ ਭਵਿੱਖੀ ਪ੍ਰੋਜੈਕਟਾਂ ਬਾਰੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਸ ਸਮਾਰੋਹ ਵਿਚ ਜੀਵਨ ਭਰ ਦੀਆਂ ਸਾਹਿਤਕ ਪ੍ਰਾਪਤੀਆਂ ਬਦਲੇ ਹਰ ਚਾਰ ਮਹੀਨੇ ਬਾਅਦ ਉਘੇ ਤੇ ਸਥਾਪਤ ਲੇਖਕਾਂ ਨੂੰ ਇਕ-ਇਕ ਲੱਖ ਰੁਪਏ ਦੇ ਸਨਮਾਨ ਭੇਟ ਕੀਤੇ ਜਾਣਗੇ।
ਸਲਾਹਕਾਰ ਨਿੰਦਰ ਘੁਗਿਆਣਵੀ ਨੇ ਮੰਚ ਸੰਚਾਲਨ ਕਰਦਿਆਂ ਗੁਲਜਾਰ ਸਿੰਘ ਸੰਧੂ ਦੀ ਸਾਹਿਤਕ ਦੇਣ ਬਾਰੇ ਚਾਨਣਾ ਪਾਇਆ। ਰਾਗ ਦੇ ਕਾਰਜਕਾਰੀ ਸੰਪਾਦਕ ਜਸਵੀਰ ਰਾਣਾ ਨੇ ਸੰਪਾਦਕੀ ਕਾਰਜ ਦੇ ਤਜੱਰਬੇ ਸਾਂਝੇ ਕਰਦਿਆਂ ਕਿਹਾ ਕਿ ਸਾਡੇ ਸਿਰਜਕ ਫਕੀਰ ਰੂਹਾਂ ਹੁੰਦੇ ਜੋ ਕਲਾ ਦੀ ਤਸ਼ਬੀ ਨਾਲ ਸਾਨੂੰ ਉਡਾਣ ਬਖਸ਼ਦੇ ਹਨ।
ਇਸ ਸਮਾਰੋਹ ਦੇ ਮੁੱਖ ਮਹਿਮਾਨ ਭਾਰਤੀ ਸਾਹਿਤ ਅਕਾਦਮੀ ਦਿੱਲੀ ਦੇ ਚੇਅਰਮੈਨ ਡਾ. ਮਾਧਵ ਕੌਸ਼ਿਕ ਸਨ। ਸ੍ਰੀ ਕੌਸ਼ਿਕ ਨੇ ਗੁਲਜਾਰ ਸਿੰਘ ਸੰਧੂ ਨਾਲ ਜੁੜੀਆਂ ਯਾਦਂ ਸਂਝੀਆਂ ਕੀਤੀਆਂ। ਡਾ. ਮਨਮੋਹਨ ਨੇ ਸਮਾਰੋਹ ਦੀ ਪ੍ਰਧਾਨਗੀ ਕੀਤੀ ਤੇ ਮਨੁੱਖੀ ਜੀਵਨ ਵਿਚ ਸਾਹਿਤ ਤੇ ਕਲਾ ਦੇ ਮਹੱਤਵਪੂਰਨ ਰੋਲ ਬਾਰੇ ਚਾਨਣਾ ਪਾਇਆ।
ਵਿਸ਼ੇਸ਼ ਮਹਿਮਾਨ ਡਾ. ਦੀਪਕ ਮਨਮੋਹਨ ਤੇ ਡਾ. ਜੰਗ ਬਹਾਦਰ ਗੋਇਲ ਨੇ ਵੀ ਸਨਮਾਨਿਤ ਲੇਖਕ ਗੁਲਜਾਰ ਸਿੰਘ ਸੰਧੂ ਦੀ ਸ਼ਖਸੀਅਤ ਤੇ ਲੇਖਣੀ ਬਾਰੇ ਆਪੋ ਆਪਣੇ ਵਿਚਾਰ ਰੱਖੇ। ਅੰਤ ਵਿੱਚ ਸ੍ਰੀ ਸੰਧੂ ਨੇ ਆਪਣੇ ਜੀਵਨ ਵਿਚ ਕਲਮ ਦੀ ਕਲਾ ਬਾਰੇ ਬੋਲਦਿਆਂ ਪਾਠਕਾਂ ਵਲੋਂ ਮਿਲੇ ਭਰਪੂਰ ਹੁੰਗਾਰੇ ਵਾਸਤੇ ਧੰਨਵਾਦ ਕੀਤਾ।
ਸਨਮਾਨ ਸੂਚੀ ਵਿੱਚ ਮਕਬੂਲ ਸਾਹਿਤਕਾਰ ਮਨਮੋਹਨ ਬਾਵਾ ਦਾ ਨਾਂ ਵੀ ਸ਼ਾਮਲ ਸੀ ਪਰ ਉਹ ਹਾਜਰ ਨਹੀ ਹੋ ਸਕੇ।
ਜਸਪਾਲ ਮਾਨਖੇੜਾ, ਕਹਾਣੀਕਾਰ ਗੁਲ ਚੌਹਾਨ, ਗੁਰਮੀਤ ਕੜਿਆਲਵੀ, ਸਤੀਸ਼ ਗੁਲਾਟੀ, ਸਿਰੀ ਰਾਮ ਅਰਸ਼, ਬਲੀਜੀਤ, ਪਾਲ ਅਜਨਬੀ, ਸੰਜੀਵਨ ਸਿੰਘ, ਨਾਟਕਕਾਰ ਡਾ. ਸਾਹਿਬ ਸਿੰਘ, ਦਵਿੰਦਰ ਬਿਮਰਾ, ਧਰਮਿੰਦਰ ਔਲਖ ਤੇ ਹੋਰ ਸ਼ਖਸ਼ੀਅਤਾਂ ਨੇ ਭਰਵੀਂ ਹਾਜਰੀ ਲਗਵਾਈ।