‘ਵਿੱਚ ਬੋਲੂੰਗਾ ਤੇਰੇ’ ਦੀ ਨਾਇਕਾ ਬਣੀ ਮੋਲੀਨਾ ਸੋਢੀ

  - ਜਸ਼ਨਪ੍ਰੀਤ-

ਪੰਜਾਬੀ ਸਿਨਮੇ ਦੇ ਸਰਗਰਮ ਦੌਰ ਵਿੱਚ ਅਨੇਕਾਂ ਖੂਬਸੁਰਤ, ਕਲਾਵਾਨ ਚਿਹਰੇ ਉੱਭਰ ਕੇ ਆ ਰਹੇ ਹਨ ਜੋ ਦਰਸ਼ਕਾਂ ਦੇ ਦਿਲਾਂ ‘ਤੇ ਰਾਜ ਕਰਨ ਦੇ ਗੁਣ ਰੱਖਦੇ ਹਨ। ਅਜਿਹੇ ਹੁਸੀਨ ਚਿਹਰਿਆ ‘ਚੋਂ ਇੱਕ ਹੈ ਮੋਲੀਨਾ ਸੋਢੀ, ਜੋ ਫ਼ਿਲਮ ‘ ਵਿੱਚ ਬੋਲੂੰਗਾ ਤੇਰੇ’ ਨਾਲ ਪੰਜਾਬੀ ਪਰਦੇ ਦਾ ਸ਼ਿੰਗਾਰ ਬਣੇਗੀ। ਦਿੱਲੀ ਦੀ ਜੰਮਪਲ ਪੰਜਾਬੀ ਪਰਿਵਾਰ ਦੀ ਇਸ ਖੂਬਸੁਰਤ, ਨੀਲੇ ਨੈਣਾਂ ਵਾਲੀ ਮੁਟਿਆਰ ਨੇ ਦੱਸਿਆ ਕਿ ਇਹ ਉਸਦੀ ਪਹਿਲੀ ਫ਼ਿਲਮ ਹੈ। ਇਸ ਤੋਂ ਪਹਿਲਾਂ ਉਸਨੇ ਪੰਜਾਬੀ ਦੇ ਅਨੇਕਾਂ ਨਾਮੀਂ ਗਾਇਕਾਂ ਦੇ ਗੀਤਾਂ ਵਿੱਚ ਮਾਡਲਿੰਗ ਕੀਤੀ ਹੈ। ਬਚਪਨ ਤੋਂ ਹੀ ਕਲਾ ਨਾਲ ਜੁੜੇ ਹੋਣ ਕਰਕੇ ਉਸਨੇ ਦਿੱਲੀ ਵਿੱਚ ਹੋਏ ਅਨੇਕਾਂ ਕੰਪੀਟਿਸਨਾਂ ਵਿੱਚ ਭਾਗ ਲਿਆ। ਆਪਣੇ ਫ਼ਿਲਮ ਵਿਚਲੇ ਕਿਰਦਾਰ ਬਾਰੇ ਗੱਲ ਕਰਦਿਆਂ ਮੋਲੀਨਾ ਨੇ ਦੱਸਿਆ ਕਿ ਇਹ ਫ਼ਿਲਮ ਲਈ ਉਸਨੂੰ ਪੰਜਾਬੀ ਸਿਨਮੇ ਦੀ ਪ੍ਰਸਿੱਧ ਹਸਤੀ ਗੁਰਮੀਤ ਸਾਜਨ ਜੀ  ਨੇ ਚੁਣਿਆ। ਇਸ ਫ਼ਿਲਮ ਵਿੱਚ ਉਸਦਾ ਕਿਰਦਾਰ ‘ਸਿਫ਼ਤ’ ਨਾਂ ਦੀ ਕੁੜੀ ਦਾ ਹੈ ਜਿਸਦੇ ਗੁਣਾਂ ਦੀ ਹਰ ਕੋਈ ਸਿਫ਼ਤ ਕਰਦਾ ਹੈ। ਸਿਫ਼ਤ ਬਹੁਤ ਹੀ ਸੂਝਵਾਨ, ਪੜ੍ਹੀ ਲਿਖੀ, ਪਿਆਰੀ ਜਿਹੀ ਕੁੜੀ ਹੈ। ਫ਼ਿਲਮ ਦੇ ਵਿਸ਼ੇ ਬਾਰੇ ਸਿਰਫ਼ ਐਨਾਂ ਹੀ ਕਹਾਂਗੀ ਕਿ ਇਹ ਮਨੋਰੰਜਨ ਦਾ ਫੁੱਲ ਪੈਕਿਜ਼ ਹੈ। ਇਸ ਵਿੱਚ ਕਾਮੇਡੀ, ਰੁਮਾਂਸ, ਟਰੈਜਡੀ, ਪਰਿਵਾਰਕ ਸਾਂਝ ਅਤੇ ਮਧੁਰ ਗੀਤ ਸੰਗੀਤ ਹੈ। ਪੰਜਾਬੀ ਗਾਇਕ ਅਤੇ ਅਦਾਕਾਰ ਰਵਿੰਦਰ ਗਰੇਵਾਲ ਨੇ ਇੱਕ ਭੂਤ ਦੇ ਕਿਰਦਾਰ ਨੂੰ ਨਿਭਾਇਆ ਹੈ, ਜੋ ਦਰਸ਼ਕਾਂ ਦਾ ਖੂਬ ਮਨੋਰੰਜਨ ਕਰੇਗਾ।

ਗੋਇਲ ਮਿਊਜ਼ਿਕ ਅਤੇ ਵਿੰਨਰਜ਼ ਫ਼ਿਲਮ ਪ੍ਰੋਡਕਸ਼ਨ ਦੇ ਬੈਨਰ ਹੇਠ ਲੇਖਕ-ਨਿਰਦੇਸ਼ਕ ਮਨਜੀਤ ਸਿੰਘ ਟੋਨੀ ਅਤੇ ਗੁਰਮੀਤ ਸਾਜਨ ਦੀ ਇਸ ਫ਼ਿਲਮ ਵਿਚ ਰਵਿੰਦਰ ਗਰੇਵਾਲ, ਮੋਲੀਨਾ ਸੋਢੀ, ਜਿੰਮੀ ਸ਼ਰਮਾਂ, ਗੁਰਮੀਤ ਸਾਜਨ,ਨਿਸ਼ਾ ਬਾਨੋ, ਅਨੀਤਾ ਮੀਤ, ਸੁੱਖੀ ਚਾਹਲ, ਮਨਜੀਤ ਮਨੀ, ਮਲਕੀਤ ਰੌਣੀ, ਪਰਮਿੰਦਰ ਕੌਰ ਗਿੱਲ, ਦਿਲਾਵਰ ਸਿੱਧੂ, ਸੁਖਦੇਵ ਬਰਨਾਲਾ, ਅੰਮ੍ਰਿਤਪਾਲ ਸਿੰਘ ਬਿੱਲਾ, ਸਤਿੰਦਰ ਕੌਰ, ਗੁਰਪ੍ਰੀਤ ਤੋਤੀ, ਜੱਸੀ ਮਾਨ ਆਦਿ ਕਲਾਕਾਰਾਂ ਨੇ ਅਹਿਮ ਕਿਰਦਾਰ ਨਿਭਾਏ ਹਨ।

ਮੋਲੀਨਾ ਨੇ ਦੱਸਿਆ ਕਿ ਫ਼ਿਲਮ ਵਿੱਚ ਪਹਿਲੀ ਵਾਰ ਕੰਮ ਕਰਦਿਆਂ ਉਸਨੂੰ ਬਹੁਤ ਕੁਝ ਸਿੱਖਣ ਦਾ ਮੌਕਾ ਮਿਲਿਆ ਹੈ ਕਿਊਕਿ ਗੀਤਾਂ ਦੀ ਅਦਾਕਾਰੀ ਤੇ ਫ਼ਿਲਮਾਂ ਦੀ ਅਦਾਕਾਰੀ ਦਾ ਬਹੁਤ ਫ਼ਰਕ ਹੁੰਦਾ ਹੈ। ਫ਼ਿਲਮ ਦੇ ਨਿਰਦੇਸ਼ਕ ਮਨਜੀਤ ਸਿੰਘ ਟੋਨੀ ਤੇ ਗੁਰਮੀਤ ਸਾਜਨ ਨੇ ਬਹੁਤ ਹੀ ਪਿਆਰ ਨਾਲ ਮੇਰੇ ਕਿਰਦਾਰ ਨੂੰ ਤਰਾਸ਼ਿਆ ਹੈ। ਭਵਿੱਖ ਵਿੱਚ ਵੀ ਮੈਂ ਪੰਜਾਬੀ ਫ਼ਿਲਮਾਂ ਰਾਹੀਂ ਪੰਜਾਬੀ ਦਰਸ਼ਕਾਂ ਦੇ ਸਨਮੁਖ ਹੁੰਦੀ ਰਹਾਂਗੀ। ਮੇਰੀ ਸਮੂਹ ਪੰਜਾਬੀ ਦਰਸ਼ਕਾਂ ਨੂੰ ਕਹਿਣਾ ਹੈ ਕਿ 14 ਅਕਤੂਬਰ ਨੂੰ ਆਪਣੇ ਪਰਿਵਾਰਾਂ ਸਮੇਤ ਫ਼ਿਲਮ ‘ ਵਿੱਚ ਬੋਲੂੰਗਾ ਤੇਰੇ’ ਵੇਖਣ ਜਰੂਰ ਜਾਣ। ਯਕੀਨਣ ਇਹ ਫ਼ਿਲਮ ਤੁਹਾਡੇ ਅਰਮਾਨਾਂ ‘ਤੇ ਖ਼ਰੀ ਉੱਤਰੇਗੀ।