ਚੰਡੀਗੜ੍ਹ, 3 ਮਈ, ਦੇਸ਼ ਕਲਿਕ ਬਿਊਰੋ :
ਚੰਡੀਗੜ੍ਹ ਤੋਂ ਗੋ ਫਸਟ ਏਅਰਲਾਇਨਜ ਦੁਆਰਾ ਸੰਚਾਲਿਤ ਸੱਤ ਉਡਾਣਾਂ ਦਾ ਸੰਚਾਲਨ 5 ਮਈ ਤੱਕ ਰੱਦ ਕਰ ਦਿੱਤਾ ਗਿਆ ਹੈ। ਸੂਤਰਾਂ ਮੁਤਾਬਕ ਕੰਪਨੀ ਨੇ ਫੰਡਾਂ ਦੀ ਕਮੀ ਕਾਰਨ ਅਗਲੇ ਤਿੰਨ ਦਿਨਾਂ ਲਈ ਦੇਸ਼ ਭਰ ਵਿੱਚ ਆਪਣਾ ਕੰਮਕਾਜ ਬੰਦ ਕਰ ਦਿੱਤਾ ਹੈ।
ਗੋ ਫਸਟ ਦੇ ਚੰਡੀਗੜ੍ਹ ਸਟੇਸ਼ਨ ਹੈੱਡ ਨੇ ਕਿਹਾ ਕਿ ਜਿਨ੍ਹਾਂ ਯਾਤਰੀਆਂ ਨੇ ਇਸ ਦੌਰਾਨ ਬੁਕਿੰਗ ਕਰਵਾਈ ਹੈ, ਉਨ੍ਹਾਂ ਨੂੰ ਯਾਤਰੀਆਂ ਦੀ ਮਰਜ਼ੀ ਨਾਲ ਰਿਫੰਡ ਦਿੱਤਾ ਜਾਵੇਗਾ, ਜੇਕਰ ਉਹ ਟਿਕਟ ਰੀ-ਸ਼ਡਿਊਲ ਕਰਨਾ ਚਾਹੁਣਗੇ ਤਾਂ ਇਸ ਨੂੰ ਰੀ-ਸ਼ਡਿਊਲ ਕੀਤਾ ਜਾਵੇਗਾ। ਏਅਰਲਾਈਨਜ਼ ਮੁਤਾਬਕ ਯਾਤਰੀ ਟੋਲ ਫਰੀ ਨੰਬਰ 18002100999 'ਤੇ ਸੰਪਰਕ ਕਰ ਸਕਦੇ ਹਨ।ਪਰ ਦੇਰ ਰਾਤ ਜਦੋਂ ਇਸ ਨੰਬਰ ‘ਤੇ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਤਾਂ ਸੰਪਰਕ ਨਹੀਂ ਹੋ ਸਕਿਆ। ਇਸ ਦੇ ਨਾਲ ਹੀ ਗੋ ਫਸਟ ਦੇ ਹਵਾਈ ਅੱਡੇ 'ਤੇ ਸਥਿਤ ਦਫਤਰ ਦੇ ਨੰਬਰ 0172-2659886 'ਤੇ ਵੀ ਸੰਪਰਕ ਕੀਤਾ ਜਾ ਸਕਦਾ ਹੈ। ਕੰਪਨੀ ਵੱਲੋਂ ਲਏ ਗਏ ਇਸ ਅਚਨਚੇਤ ਫੈਸਲੇ ਕਾਰਨ ਯਾਤਰੀਆਂ ਨੂੰ ਕਾਫੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਵੇਗਾ।