ਮਿਲਟਨ : ਕੈਨੇਡਾ ਦੇ ਸੂਬੇ ਉਨਟਾਰੀਓ ਵਿੱਚ ਪੰਜਾਬੀਆਂ ਦੇ ਰੈਸਟੋਰੈਂਟ ਨੂੰ ਲੁੱਟਣ ਵਾਲੇ ਚਾਰ ਲੁਟੇਰਿਆਂ ਨੂੰ ਪੁਲਿਸ ਵੱਲੋਂ ਕਾਬੂ ਕਰ ਲਿਆ ਗਿਆ ਹੈ। ਜਿਨ੍ਹਾਂ ਦੀ ਪਹਿਚਾਣ ਦੋ ਬਰੈਂਪਟਨ ਤੇ ਦੋ ਇਟੋਬੀਕੋਕ ਦੇ ਰਹਿਣ ਵਾਲੇ ਵਜੋਂ ਹੋਈ ਹੈ। ਫੜ੍ਹੇ ਗਏ ਵਿਅਕਤੀਆਂ ਨੇ ਇੱਕੋ ਰਾਤ ਰੱਬਾ ਫਾਈਨ ਫੂਡਸ ਸਣੇ ਕਈ ਥਾਵਾਂ 'ਤੇ ਲੁੱਟ ਦੀ ਘਟਨਾ ਨੂੰ ਅੰਜਾਮ ਦਿੱਤਾ ਸੀ। ਪੁਲਿਸ ਨੇ ਦੱਸਿਆ ਕਿ ਬਰਲਿੰਗਟਨ ਅਤੇ ਮਿਲਟਨ ਸ਼ਹਿਰਾਂ ਵਿੱਚ 25 ਅਤੇ 26 ਜਨਵਰੀ ਦੀ ਦਰਮਿਆਨੀ ਰਾਤ ਨੂੰ ਕਈ ਥਾਵਾਂ 'ਤੇ ਲੁੱਟ ਹੋਈ ਸੀ। ਪਹਿਲੀ ਘਟਨਾ ਮਿਲਟਨ ਸ਼ਹਿਰ ਦੇ ਡੇਰੀ ਰੋਡ 'ਤੇ ਪੈਂਦੇ ਪੰਜਾਬੀਆਂ ਦੇ ਇੱਕ ਰੈਸਟੋਰੈਂਟ 'ਰੱਬਾ ਫਾਈਨ ਫੂਡਸ' ਉੱਤੇ ਵਾਪਰੀ, ਜਿੱਥੇ ਰਾਤ ਨੂੰ ਦੋ ਲੁਟੇਰੇ ਦਾਖ਼ਲ ਹੋਏ ਅਤੇ ਰੈਸਟੋਰੈਂਟ ਦੇ ਕਲਰਕ ਕੋਲੋਂ ਨਕਦੀ ਖੋਕ ਕੇ ਫਰਾਰ ਹੋ ਗਏ।
ਪੁਲਿਸ ਨੇ ਦੱਸਿਆ ਕਿ ਇਨ੍ਹਾਂ ਲੁਟੇਰਿਆਂ ਨੇ ਹੀ ਆਪਣੇ ਦੋ ਹੋਰ ਸਾਥੀਆਂ ਨਾਲ ਮਿਲ ਕੇ ਰਾਤ ਨੂੰ ਲਗਭਗ ਇੱਕ ਵਜੇ ਬਰਲਿੰਗਟਨ ਸ਼ਹਿਰ ਵਿੱਚ ਪੈਂਦੇ ਐਸੋ ਗੈਸ ਸਟੇਸ਼ਨ 'ਤੇ ਨਕਦੀ ਲੁੱਟੀ। ਇਸ ਤੋਂ ਕੁਝ ਮਿੰਟ ਬਾਅਦ ਹੀ ਇਹ ਚਾਰੇ ਲੁਟੇਰੇ ਹਾਰਵੈਸਟਰ ਰੋਡ 'ਤੇ ਪੈਂਦੇ ਐਸੋ ਗੈਸ ਸਟੇਸ਼ਨ 'ਤੇ ਗਏ ਅਤੇ ਲੁੱਟ ਦੀ ਘਟਨਾ ਨੂੰ ਅੰਜਾਮ ਦੇਣ ਮਗਰੋਂ ਫਰਾਰ ਹੋ ਗਏ।
ਪੁਲਿਸ ਨੇ ਇਸ ਲੁਟੇਰਾ ਗਿਰੋਹ ਨੂੰ ਡੋਰਵਲ ਡਰਾਈਵ 'ਤੇ ਕੁਈਨਜ਼ ਐਲਿਜ਼ਾਬੈਥ ਵੇਅ ਵਿਖੇ ਗ੍ਰਿਫ਼ਤਾਰ ਕਰ ਲਿਆ।