ਹਿਮਾਚਲ ‘ਚ ਭਾਰੀ ਮੀਂਹ ਨੇ ਮਚਾਈ ਤਬਾਹੀ,ਮੰਡੀ ਜ਼ਿਲ੍ਹੇ ‘ਚ ਕਈ ਵਾਹਨ ਪਾਣੀ ‘ਚ ਰੁੜੇ, ਆਵਾਜਾਈ ਬੰਦ

 ਸ਼ਿਮਲਾ,25 ਜੂਨ,ਦੇਸ਼ ਕਲਿਕ ਬਿਊਰੋ:

ਹਿਮਾਚਲ ਪ੍ਰਦੇਸ਼ 'ਚ ਮੀਂਹ ਦਾ ਕਹਿਰ ਜਾਰੀ ਹੈ। ਭਾਰੀ ਮੀਂਹ ਕਾਰਨ ਮੰਡੀ ਜ਼ਿਲ੍ਹੇ ਦੀ ਸੇਰਾਜ ਘਾਟੀ ਵਿੱਚ ਕਾਫੀ ਨੁਕਸਾਨ ਹੋਇਆ ਹੈ। ਸੇਰਾਜ ਦੇ ਤੁੰਗਾਧਾਰ ਵਿਖੇ ਭਾਰੀ ਮੀਂਹ ਕਾਰਨ ਆਏ ਹੜ੍ਹ ਵਿੱਚ ਕਈ ਵਾਹਨ ਵਹਿ ਗਏ। ਦੱਸਿਆ ਜਾ ਰਿਹਾ ਹੈ ਕਿ ਕੁੱਲੂ ਦੇ ਮੋਹਲ ਡਰੇਨ 'ਚ ਨਰੋਨੀ ਪਿੰਡ ਦੇ ਰਸਤੇ 'ਤੇ ਖੜ੍ਹੇ ਵਾਹਨ ਹੜ੍ਹ ਦੇ ਪਾਣੀ 'ਚ ਵਹਿ ਗਏ। ਭਾਰੀ ਬਰਸਾਤ ਕਾਰਨ ਡਰੇਨ ਵਿੱਚ ਹੜ੍ਹ ਆਉਣ ਕਾਰਨ ਪੂਰੇ ਇਲਾਕੇ ਵਿੱਚ ਹਫੜਾ-ਦਫੜੀ ਮਚ ਗਈ।ਸ਼ਨੀਵਾਰ ਦੇਰ ਰਾਤ ਤੋਂ ਸ਼ੁਰੂ ਹੋਈ ਬਾਰਿਸ਼ ਕਾਰਨ ਮੰਡੀ ਜ਼ਿਲੇ 'ਚ ਕੁਦਰਤ ਨੇ ਕਹਿਰ ਮਚਾ ਦਿੱਤਾ ਹੈ। ਤਾਜ਼ਾ ਘਟਨਾਕ੍ਰਮ ਵਿੱਚ, ਸਾਬਕਾ ਮੁੱਖ ਮੰਤਰੀ ਜੈਰਾਮ ਠਾਕੁਰ ਦੇ ਗ੍ਰਹਿ ਵਿਧਾਨ ਸਭਾ ਹਲਕੇ ਸੇਰਾਜ ਦੇ ਜੰਜੇਲੀ ਦੇ ਤੁੰਗਧਾਰ ਪਿੰਡ ਵਿੱਚ ਹੜ੍ਹ ਆ ਗਿਆ।ਇਸ ਕਾਰਨ ਡਰੇਨ ਦੇ ਨਾਲ ਖੜ੍ਹੇ 4 ਵਾਹਨ ਨੁਕਸਾਨੇ ਗਏ ਹਨ। ਇਸ ਵਿੱਚ ਇੱਕ ਟਰੈਕਟਰ, ਸਕਾਰਪੀਓ, ਪਿਕਅੱਪ ਅਤੇ ਟਾਟਾ ਦੀ ਗੱਡੀ ਜ਼ੈਸਟ ਸ਼ਾਮਲ ਹੈ। ਇਸ ਤੋਂ ਇਲਾਵਾ ਇਲਾਕੇ ਦੇ ਘਰਾਂ ਨੂੰ ਵੀ ਭਾਰੀ ਨੁਕਸਾਨ ਪੁੱਜਾ ਹੈ। ਸੀਰਾਜ ਦੇ ਬਾਗਸੀਆਦ 'ਚ ਜ਼ਮੀਨ ਖਿਸਕਣ ਨਾਲ ਇਕ ਘਰ ਨੁਕਸਾਨਿਆ ਗਿਆ ਅਤੇ ਦੋ ਵਾਹਨ ਮਲਬੇ 'ਚ ਦੱਬ ਗਏ। ਬਰਸਾਤ ਕਾਰਨ ਚੋਲਚੌਂਕ-ਜੰਜੇਲੀ ਰੋਡ ਨੂੰ ਵੀ ਵਾਹਨਾਂ ਦੀ ਆਵਾਜਾਈ ਲਈ ਬੰਦ ਕਰ ਦਿੱਤਾ ਗਿਆ ਹੈ।