ਐਲਨ ਮਸਕ ਨੇ ਭਾਰਤ ‘ਚ ਟਵਿੱਟਰ ਦੇ ਤਿੰਨ ‘ਚੋਂ ਦੋ ਦਫ਼ਤਰ ਕੀਤੇ ਬੰਦ

ਨਵੀਂ ਦਿੱਲੀ,17 ਫ਼ਰਵਰੀ,ਦੇਸ਼ ਕਲਿੱਕ ਬਿਊਰੋ:

ਪਹਿਲਾਂ ਹੀ ਘਾਟੇ ਵਿਚ ਚੱਲ ਰਹੀ ਮਾਈਕ੍ਰੋ ਬਲੌਗਿੰਗ ਸਾਈਟ ਟਵਿਟਰ ਨੇ ਭਾਰਤ ਵਿਚ ਆਪਣੇ ਤਿੰਨ ਦਫਤਰਾਂ ਵਿਚੋਂ ਦੋ ਨੂੰ ਬੰਦ ਕਰ ਦਿੱਤਾ ਹੈ। ਕੰਪਨੀ ਨੇ ਆਪਣੇ ਕਰਮਚਾਰੀਆਂ ਨੂੰ ਘਰ ਤੋਂ ਕੰਮ ਕਰਨ ਲਈ ਕਿਹਾ ਹੈ। ਜਦੋਂ ਤੋਂ ਐਲੋਨ ਮਸਕ ਨੇ ਟਵਿਟਰ ਖਰੀਦਿਆ ਹੈ, ਕੰਪਨੀ ਵਿੱਚ ਕਈ ਵੱਡੇ ਬਦਲਾਅ ਦੇਖਣ ਨੂੰ ਮਿਲੇ ਹਨ। ਕੰਪਨੀ ਨੇ ਪਿਛਲੇ ਸਾਲ ਦੇ ਅੰਤ ਵਿੱਚ ਭਾਰਤ ਵਿੱਚ ਆਪਣੇ ਲਗਭਗ 200 ਤੋਂ ਵੱਧ ਕਰਮਚਾਰੀਆਂ ਵਿੱਚੋਂ 90% ਤੋਂ ਵੱਧ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਸੀ। ਇਸ ਨੇ ਹੁਣ ਸਿਆਸੀ ਕੇਂਦਰ ਨਵੀਂ ਦਿੱਲੀ ਅਤੇ ਵਿੱਤੀ ਕੇਂਦਰ ਮੁੰਬਈ ਵਿੱਚ ਆਪਣੇ ਦਫ਼ਤਰ ਬੰਦ ਕਰ ਦਿੱਤੇ ਹਨ।ਬਲੂਮਬਰਗ ਦੀ ਰਿਪੋਰਟ ਮੁਤਾਬਕ ਟਵਿਟਰ ਦਾ ਹੁਣ ਭਾਰਤ 'ਚ ਸਿਰਫ ਇਕ ਦਫਤਰ ਬਚਿਆ ਹੈ। ਕੰਪਨੀ ਬੇਂਗਲੁਰੂ ਦੇ ਦੱਖਣੀ ਤਕਨੀਕੀ ਹੱਬ ਵਿੱਚ ਦਫਤਰ ਚਲਾਉਣਾ ਜਾਰੀ ਰੱਖੇਗੀ, ਜਿਸ ਵਿੱਚ ਜ਼ਿਆਦਾਤਰ ਇੰਜੀਨੀਅਰ ਕੰਮ ਕਰਦੇ ਹਨ। ਟਵਿੱਟਰ ਦੇ ਇੱਕ ਕਰਮਚਾਰੀ ਨੇ ਨਾਮ ਗੁਪਤ ਰੱਖਣ ਦੀ ਸ਼ਰਤ 'ਤੇ ਇਹ ਜਾਣਕਾਰੀ ਸਾਂਝੀ ਕੀਤੀ ਹੈ। ਅਰਬਪਤੀ ਸੀਈਓ ਮਸਕ ਨੇ 2023 ਦੇ ਅੰਤ ਤੱਕ ਟਵਿੱਟਰ ਨੂੰ ਵਿੱਤੀ ਤੌਰ 'ਤੇ ਸਥਿਰ ਕਰਨ ਦੀ ਕੋਸ਼ਿਸ਼ ਦੇ ਹਿੱਸੇ ਵਜੋਂ ਦੁਨੀਆ ਭਰ ਦੇ ਕਰਮਚਾਰੀਆਂ ਦੀ ਛਾਂਟੀ ਕੀਤੀ ਅਤੇ ਦਫਤਰਾਂ ਨੂੰ ਬੰਦ ਕਰ ਦਿੱਤਾ ਹੈ।