ਨਵੀਂ ਦਿੱਲੀ, 17 ਫ਼ਰਵਰੀ, ਦੇਸ਼ ਕਲਿਕ ਬਿਊਰੋ:
ਦਿੱਲੀ ਅਤੇ ਮੁੰਬਈ ਸਥਿਤ ਬ੍ਰਿਟਿਸ਼ ਬ੍ਰੌਡਕਾਸਟਿੰਗ ਕਾਰਪੋਰੇਸ਼ਨ (ਬੀ.ਬੀ.ਸੀ.) ਦੇ ਦਫਤਰਾਂ 'ਤੇ ਆਮਦਨ ਕਰ ਵਿਭਾਗ (ਆਈਟੀ) ਦਾ ਸਰਵੇ 60 ਘੰਟਿਆਂ ਬਾਅਦ ਪੂਰਾ ਹੋਇਆ। ਆਈਟੀ ਟੀਮ ਨੇ ਮੰਗਲਵਾਰ ਸਵੇਰੇ 11:30 ਵਜੇ ਬੀਬੀਸੀ ਦਫ਼ਤਰਾਂ ਵਿੱਚ ਸਰਵੇਖਣ ਸ਼ੁਰੂ ਕੀਤਾ, ਜੋ ਵੀਰਵਾਰ ਦੇਰ ਰਾਤ ਖ਼ਤਮ ਹੋਇਆ। ਆਈਟੀ ਟੀਮ ਦੇਰ ਰਾਤ 11 ਵਜੇ ਬੀਬੀਸੀ ਦਫ਼ਤਰਾਂ ਤੋਂ ਰਵਾਨਾ ਹੋਈ।
ਬੀਬੀਸੀ ਦੇ ਬੁਲਾਰੇ ਨੇ ਇੱਕ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਆਮਦਨ ਕਰ ਵਿਭਾਗ ਦੇ ਅਧਿਕਾਰੀ ਦਿੱਲੀ ਅਤੇ ਮੁੰਬਈ ਵਿੱਚ ਸਾਡੇ ਦਫ਼ਤਰਾਂ ‘ਚੋਂ ਜਾ ਚੁੱਕੇ ਹਨ। ਅਸੀਂ ਆਈਟੀ ਟੀਮ ਨਾਲ ਸਹਿਯੋਗ ਕਰਨਾ ਜਾਰੀ ਰੱਖਾਂਗੇ। ਉਮੀਦ ਹੈ ਕਿ ਜਲਦੀ ਹੀ ਮਾਮਲਾ ਸੁਲਝਾ ਲਿਆ ਜਾਵੇਗਾ। ਅਸੀਂ ਆਪਣੇ ਕਰਮਚਾਰੀਆਂ ਦਾ ਪੂਰਾ ਸਮਰਥਨ ਕਰ ਰਹੇ ਹਾਂ।ਉਨ੍ਹਾਂ ਦਾ ਧਿਆਨ ਵੀ ਰੱਖ ਰਹੇ ਹਾਂ। ਖਾਸ ਕਰਕੇ ਜਿਨ੍ਹਾਂ ਤੋਂ ਕਾਫੀ ਦੇਰ ਤੱਕ ਪੁੱਛ-ਪੜਤਾਲ ਕੀਤੀ ਗਈ, ਕਈਆਂ ਨੂੰ ਸਾਰੀ ਰਾਤ ਦਫ਼ਤਰ ਵਿੱਚ ਹੀ ਰਹਿਣਾ ਪਿਆ। ਅਜਿਹੇ ਕਰਮਚਾਰੀਆਂ ਦਾ ਖਿਆਲ ਰੱਖਣਾ ਸਾਡੀ ਪਹਿਲ ਹੈ।
ਸੂਤਰਾਂ ਨੇ ਦੱਸਿਆ ਕਿ ਸਰਵੇ ਦੌਰਾਨ ਦਿੱਲੀ ਦਫ਼ਤਰ ਦੇ 10 ਸੀਨੀਅਰ ਮੁਲਾਜ਼ਮਾਂ ਨੇ ਦੋ ਰਾਤਾਂ ਦਫ਼ਤਰ ਵਿੱਚ ਹੀ ਬਿਤਾਈਆਂ। ਜਦੋਂ ਆਈ.ਟੀ. ਟੀਮ ਸਰਵੇ ਪੂਰਾ ਕਰਕੇ ਦਫਤਰ ‘ਚੋਂ ਰਵਾਨਾ ਹੋਈ ਤਾਂ ਇਹ ਕਰਮਚਾਰੀ ਵੀਰਵਾਰ ਰਾਤ ਨੂੰ ਆਪਣੇ ਘਰ ਪਹੁੰਚੇ। ਹਾਲਾਂਕਿ, ਹੋਰ ਕਰਮਚਾਰੀਆਂ ਨੂੰ ਅਗਲੇ ਨੋਟਿਸ ਤੱਕ ਘਰ ਤੋਂ ਕੰਮ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਆਮਦਨ ਕਰ ਵਿਭਾਗ ਦੇ ਅਧਿਕਾਰੀਆਂ ਨੇ ਬੁੱਧਵਾਰ ਨੂੰ ਕਰਮਚਾਰੀਆਂ ਤੋਂ ਵਿੱਤੀ ਅੰਕੜੇ ਇਕੱਠੇ ਕੀਤੇ।