ਕਬਜ਼ਾ ਹਟਾਉਣ ਦੌਰਾਨ ਪੁਲੀਸ-ਪ੍ਰਸ਼ਾਸਨ ਦੀ ਮੌਜੂਦਗੀ ‘ਚ ਮਾਂ-ਧੀ ਦੀ ਜ਼ਿੰਦਾ ਜਲ ਕੇ ਮੌਤ, ਪਤੀ ਜ਼ਖ਼ਮੀ,ਹਾਲਾਤ ਤਣਾਅਪੁਰਨ

ਕਾਨਪੁਰ,14 ਫ਼ਰਵਰੀ,ਦੇਸ਼ ਕਲਿਕ ਬਿਊਰੋ:

ਯੂਪੀ ਦੇ ਕਾਨਪੁਰ ਦੇ ਦੇਹਾਤੀ ਇਲਾਕੇ 'ਚ ਮੈਥਾ ਤਹਿਸੀਲ ਦੇ ਪਿੰਡ ਮੜੌਲੀ 'ਚ ਕਬਜ਼ੇ ਹਟਾਉਣ ਦੌਰਾਨ ਮਾਂ-ਧੀ ਦੀ ਜ਼ਿੰਦਾ ਜਲ ਕੇ ਮੌਤ ਹੋ ਗਈ। ਪੁਲੀਸ-ਪ੍ਰਸ਼ਾਸਨ ਸਰਕਾਰੀ ਜ਼ਮੀਨ ਤੋਂ ਨਾਜਾਇਜ਼ ਕਬਜ਼ੇ ਹਟਾਉਣ ਲਈ ਗਿਆ ਸੀ। ਇਸੇ ਦੌਰਾਨ ਇੱਕ ਔਰਤ ਚੀਕਦੀ ਹੋਈ ਝੌਂਪੜੀ ਵੱਲ ਭੱਜੀ। ਉਹ ਅੰਦਰੋਂ ਦਰਵਾਜ਼ਾ ਬੰਦ ਕਰ ਦਿੰਦੀ ਹੈ। ਪੁਲਿਸ ਵੀ ਭੱਜਦੀ ਹੋਈ ਉੱਥੇ ਪਹੁੰਚ ਗਈ। ਉਹ ਦਰਵਾਜ਼ਾ ਤੋੜਦੀ ਹੈ। ਇਸੇ ਦੌਰਾਨ ਝੌਂਪੜੀ ਨੂੰ ਅੱਗ ਲੱਗ ਗਈ। ਔਰਤ ਅਤੇ ਉਸਦੀ ਧੀ ਅੰਦਰ ਸਨ। ਦੋਵਾਂ ਨੂੰ ਪੁਲਿਸ ਫੋਰਸ ਅਤੇ ਅਧਿਕਾਰੀਆਂ ਦੇ ਸਾਹਮਣੇ ਦੋਵਾਂ ਦੀ ਜ਼ਿੰਦਾ ਜਲ ਕੇ ਮੌਤ ਹੋ ਗਈ। ਇਸ ਦੇ ਨਾਲ ਹੀ ਪਤੀ ਕ੍ਰਿਸ਼ਨ ਗੋਪਾਲ ਦੋਵਾਂ ਨੂੰ ਬਚਾਉਂਦੇ ਹੋਏ ਬੁਰੀ ਤਰ੍ਹਾਂ ਨਾਲ ਝੁਲਸ ਗਿਆ।ਪੁਲਿਸ ਨੇ ਅੱਗ ਬੁਝਾਉਣ ਲਈ ਬੁਲਡੋਜ਼ਰ ਮੰਗਵਾਇਆ ਅਤੇ ਝੌਂਪੜੀ ਨੂੰ ਢਾਹ ਦਿੱਤਾ। ਸੋਮਵਾਰ ਸ਼ਾਮ ਨੂੰ ਵਾਪਰੀ ਇਸ ਘਟਨਾ ਨਾਲ ਸਬੰਧਤ 2.30 ਮਿੰਟ ਦਾ ਵੀਡੀਓ ਵੀ ਸਾਹਮਣੇ ਆਇਆ ਹੈ। ਮੈਥਾ ਤਹਿਸੀਲ ਦੇ ਪਿੰਡ ਮੜੌਲੀ 'ਚ ਮਾਂ-ਧੀ ਦੀ ਮੌਤ ਤੋਂ ਬਾਅਦ ਪਿੰਡ ਵਾਸੀਆਂ 'ਚ ਹੜਕੰਪ ਮਚ ਗਿਆ। ਪਿੰਡ ਵਾਸੀਆਂ ਨੇ ਪੁਲੀਸ-ਪ੍ਰਸ਼ਾਸ਼ਨਿਕ ਅਧਿਕਾਰੀਆਂ ਨੂੰ ਭਜਾ ਦਿੱਤਾ। ਅਧਿਕਾਰੀਆਂ ਨੇ ਭੱਜ ਕੇ ਆਪਣੀ ਜਾਨ ਬਚਾਈ।ਪਿੰਡ ਵਿੱਚ ਤਣਾਅ ਦੇ ਮੱਦੇਨਜ਼ਰ ਭਾਰੀ ਪੁਲੀਸ ਫੋਰਸ ਤਾਇਨਾਤ ਕੀਤੀ ਗਈ ਹੈ। ਪਿੰਡ ਵਾਸੀ ਰਾਤ 12 ਵਜੇ ਤੱਕ ਹੰਗਾਮਾ ਕਰਦੇ ਰਹੇ।ਸਕੇ ਸੰਬੰਧੀਆਂ ਨੇ ਰਾਤ 12 ਵਜੇ ਤੱਕ ਲਾਸ਼ਾਂ ਨੂੰ ਚੁੱਕਣ ਨਹੀਂ ਦਿੱਤਾ। ਕਾਨਪੁਰ ਦੇ ਕਮਿਸ਼ਨਰ ਰਾਜ ਸ਼ੇਖਰ, ਡੀਐਮ ਨੇਹਾ ਜੈਨ, ਏਡੀਜੀ ਆਲੋਕ ਕੁਮਾਰ ਅਤੇ ਹੋਰ ਅਧਿਕਾਰੀ ਦੇਰ ਰਾਤ ਤੱਕ ਮੌਕੇ 'ਤੇ ਰਹੇ। ਰਾਜ ਮੰਤਰੀ ਪ੍ਰਤਿਭਾ ਸ਼ੁਕਲਾ ਵੀ ਪਹੁੰਚੀ। ਪਰਿਵਾਰਕ ਮੈਂਬਰਾਂ ਨਾਲ ਗੱਲਬਾਤ ਕੀਤੀ। ਫਿਰ ਰਾਤ 1 ਵਜੇ ਮਾਂ-ਧੀ ਦੀ ਲਾਸ਼ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਗਿਆ।ਪਰਿਵਾਰਕ ਮੈਂਬਰਾਂ ਦੀ ਸ਼ਿਕਾਇਤ 'ਤੇ ਐੱਸਡੀਐੱਮ ਮੈਥਾ ਗਿਆਨੇਸ਼ਵਰ ਪ੍ਰਸਾਦ, ਰੂਰਾ ਦੇ ਐੱਸਐੱਚਓ ਦਿਨੇਸ਼ ਗੌਤਮ, ਲੇਖਪਾਲ ਅਸ਼ੋਕ ਸਿੰਘ ਸਮੇਤ ਕਈ ਪੁਲਸ ਮੁਲਾਜ਼ਮਾਂ ਤੇ ਮਾਲ ਮੁਲਾਜ਼ਮਾਂ ਖ਼ਿਲਾਫ਼ ਕਤਲ ਦਾ ਕੇਸ ਦਰਜ ਕੀਤਾ ਗਿਆ ਹੈ।ਮਾਂ-ਧੀ ਦੀ ਮੌਤ ਤੋਂ ਬਾਅਦ ਮਾਮਲਾ ਵਿਗੜ ਗਿਆ। ਪਿੰਡ ਵਾਸੀ ਗੁੱਸੇ ਵਿੱਚ ਆ ਗਏ। ਪਰਿਵਾਰ ਦਾ ਦੋਸ਼ ਹੈ ਕਿ ਅਧਿਕਾਰੀਆਂ ਨੇ ਝੌਂਪੜੀ ਨੂੰ ਅੱਗ ਲਗਾਈ ਹੈ। ਦੂਜੇ ਪਾਸੇ ਅੱਗ ਲਾਉਣ ਬਾਰੇ ਅਧਿਕਾਰੀ ਸਪੱਸ਼ਟ ਤੌਰ ’ਤੇ ਕੁਝ ਨਹੀਂ ਕਹਿ ਰਹੇ ਹਨ। ਉਹ ਜਾਂਚ ਦੀ ਗੱਲ ਕਰ ਰਹੇ ਹਨ।