ਲਹਾਸਾ, 19 ਜਨਵਰੀ, ਦੇਸ਼ ਕਲਿਕ ਬਿਊਰੋ:
ਚੀਨ ਦੇ ਤਿੱਬਤ ਦੇ ਦੱਖਣ-ਪੱਛਮੀ ਖੇਤਰ ਵਿਚ ਸਥਿਤ ਨਿਯੰਗਚੀ ਸ਼ਹਿਰ ਵਿਚ ਭਾਰੀ ਬਰਫ਼ਬਾਰੀ ਕਾਰਨ ਵੱਡੇ ਨੁਕਸਾਨ ਦਾ ਅਨੁਮਾਨ ਲਗਾਇਆ ਜਾ ਰਿਹਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਨਿਯੰਗਚੀ ਸ਼ਹਿਰ 'ਚ ਇਸ ਬਰਫੀਲੇ ਤੂਫਾਨ ਕਾਰਨ ਘੱਟੋ-ਘੱਟ ਅੱਠ ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦੋਂ ਕਿ ਪਹਾੜਾਂ ਤੋਂ ਡਿੱਗੀ ਬਰਫ ਦੇ ਹੇਠਾਂ ਕਈ ਲੋਕ ਦੱਬ ਗਏ ਹਨ। ਇਸ ਦੇ ਨਾਲ ਹੀ ਚੀਨ ਦੀ ਸਰਕਾਰ ਨੇ ਲਾਸ਼ਾਂ ਅਤੇ ਲਾਪਤਾ ਲੋਕਾਂ ਦੀ ਬਰਾਮਦਗੀ ਵਿੱਚ ਮਦਦ ਲਈ ਇੱਕ ਟੀਮ ਭੇਜੀ ਹੈ। ਮੰਗਲਵਾਰ ਰਾਤ 8 ਵਜੇ ਦੇ ਕਰੀਬ ਮੇਨਲਿੰਗ ਕਾਉਂਟੀ ਵਿੱਚ ਪਾਈ ਪਿੰਡ ਅਤੇ ਮੇਡੋਗ ਕਾਉਂਟੀ ਵਿੱਚ ਡੌਕਸੋਂਗ ਲਾ ਸੁਰੰਗ ਦੇ ਨਿਕਾਸ ਦੇ ਵਿਚਕਾਰ ਸੜਕ ਦੇ ਇੱਕ ਹਿੱਸੇ ਵਿੱਚ ਬਰਫ਼ ਦਾ ਤੋਦਾ ਆ ਗਿਆ। ਫਿਲਹਾਲ ਇਹ ਸਪੱਸ਼ਟ ਨਹੀਂ ਹੈ ਕਿ ਕਿੰਨੇ ਲੋਕ ਲਾਪਤਾ ਹਨ ਅਤੇ ਅਧਿਕਾਰੀਆਂ ਵੱਲੋਂ ਕੋਈ ਵੇਰਵੇ ਜਾਰੀ ਨਹੀਂ ਕੀਤੇ ਗਏ ਹਨ।