ਹੈਦਰਾਬਾਦ, 17 ਦਸੰਬਰ, ਦੇਸ਼ ਕਲਿਕ ਬਿਊਰੋ :
ਤੇਲੰਗਾਨਾ ਦੇ ਮਨਚੇਰੀਅਲ ਵਿੱਚ ਇੱਕ ਦਰਦਨਾਕ ਘਟਨਾ ਵਾਪਰੀ ਹੈ। ਇੱਥੇ ਮੰਦਾਮਾਰੀ ਮੰਡਲ ਵਿੱਚ ਇੱਕ ਘਰ ਨੂੰ ਲੱਗੀ ਭਿਆਨਕ ਅੱਗ ਵਿੱਚ ਇੱਕੋ ਪਰਿਵਾਰ ਦੇ 6 ਲੋਕ ਜ਼ਿੰਦਾ ਸੜ ਗਏ। ਘਰ ਦਾ ਮਾਲਕ 50 ਸਾਲਾ ਸ਼ਿਵਯਾ, ਉਸ ਦੀ 45 ਸਾਲਾ ਪਤਨੀ ਪਦਮਾ, ਪਦਮਾ ਦੀ ਵੱਡੀ ਭੈਣ ਦੀ 23 ਸਾਲਾ ਧੀ ਮੋਨਿਕਾ, ਉਸ ਦੀਆਂ ਦੋ ਧੀਆਂ ਅਤੇ ਇਕ ਹੋਰ ਔਰਤ ਇਸ ਭਿਆਨਕ ਹਾਦਸੇ ਦਾ ਸ਼ਿਕਾਰ ਹੋ ਗਈ। ਮੰਦਾਮਾਰੀ ਸਰਕਲ ਦੇ ਪੁਲਸ ਇੰਸਪੈਕਟਰ ਪ੍ਰਮੋਦ ਕੁਮਾਰ ਨੇ ਦੱਸਿਆ ਕਿ ਸ਼ਿਵਯਾ ਆਪਣੀ ਪਤਨੀ ਪਦਮਾ ਮੰਦਾਮਾਰੀ ਮੰਡਲ ਨਾਲ ਵੈਂਕਟਪੁਰ ਸਥਿਤ ਆਪਣੇ ਘਰ ਰਹਿੰਦਾ ਸੀ। ਦੋ ਦਿਨ ਪਹਿਲਾਂ ਪਦਮਾ ਦੀ ਭਤੀਜੀ ਮੋਨਿਕਾ ਦੋ ਬੇਟੀਆਂ ਅਤੇ ਸ਼ਾਂਤਾਯਾ ਨਾਂ ਦੀ ਔਰਤ ਨਾਲ ਆਈ ਸੀ ਅਤੇ ਉਸੇ ਘਰ ਵਿਚ ਰਹਿ ਰਹੀ ਸੀ।ਰਾਤ 12 ਤੋਂ 12:30 ਵਜੇ ਦੇ ਦਰਮਿਆਨ ਗੁਆਂਢੀਆਂ ਨੇ ਸ਼ਿਵਾਏ ਦੇ ਘਰ 'ਚੋਂ ਅੱਗ ਦੀਆਂ ਲਪਟਾਂ ਨਿਕਲਦੀਆਂ ਦੇਖੀਆਂ ਤਾਂ ਉਨ੍ਹਾਂ ਤੁਰੰਤ ਪਿੰਡ ਵਾਸੀਆਂ ਅਤੇ ਫਿਰ ਪੁਲਸ ਨੂੰ ਸੂਚਨਾ ਦਿੱਤੀ। ਪੁਲਸ ਨੇ ਦੱਸਿਆ ਕਿ ਜਦੋਂ ਤੱਕ ਅਸੀਂ ਪਹੁੰਚੇ, ਉਦੋਂ ਤੱਕ ਪੂਰਾ ਘਰ ਅੱਗ ਦੀ ਲਪੇਟ 'ਚ ਸੀ ਅਤੇ ਸਾਰੇ 6 ਲੋਕ ਜ਼ਿੰਦਾ ਸੜ ਚੁੱਕੇ ਸਨ। ਜਾਣਕਾਰੀ ਮੁਤਾਬਕ ਘਰ 'ਚ ਮੌਜੂਦ ਕੁੱਲ 6 ਮੈਂਬਰਾਂ ਦੀ ਮੌਤ ਹੋ ਗਈ ਹੈ। ਅੱਗ ਲੱਗਣ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।