ਦੇਹਰਾਦੂਨ,11 ਨਵੰਬਰ,ਦੇਸ਼ ਕਲਿਕ ਬਿਊਰੋ:
ਉੱਤਰਾਖੰਡ ਸਰਕਾਰ ਨੇ ਰਾਮਦੇਵ ਦੇ ਪਤੰਜਲੀ ਸਮੂਹ ਦੀਆਂ ਪੰਜ ਦਵਾਈਆਂ ਦੇ ਉਤਪਾਦਨ 'ਤੇ ਪਾਬੰਦੀ ਲਗਾ ਦਿੱਤੀ ਹੈ। ਇਹ ਦਵਾਈਆਂ ਦਿਵਿਆ ਫਾਰਮੇਸੀ ਦੁਆਰਾ ਨਿਰਮਿਤ ਹਨ। ਉੱਤਰਾਖੰਡ ਦੀ ਆਯੁਰਵੇਦ ਅਤੇ ਯੂਨਾਨੀ ਲਾਇਸੈਂਸਿੰਗ ਅਥਾਰਟੀ ਮੁਤਾਬਕ ਇਨ੍ਹਾਂ ਦਵਾਈਆਂ ਦਾ ਇਸ਼ਤਿਹਾਰ ਗੁੰਮਰਾਹਕੁੰਨ ਹੈ। ਹਾਲਾਂਕਿ ਰਾਮਦੇਵ ਨੇ ਕਿਹਾ ਹੈ ਕਿ ਉਨ੍ਹਾਂ ਨੂੰ ਅਜੇ ਤੱਕ ਅਜਿਹੇ ਕਿਸੇ ਆਦੇਸ਼ ਦੀ ਕਾਪੀ ਨਹੀਂ ਮਿਲੀ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਦਵਾਈਆਂ ’ਤੇ ਪਾਬੰਦੀ ਲਾਉਣ ਪਿੱਛੇ ਆਯੁਰਵੇਦ ਵਿਰੋਧੀ ਡਰੱਗ ਮਾਫੀਆ ਦੀ ਸਾਜ਼ਿਸ਼ ਹੈ।ਅਥਾਰਟੀ ਨੇ ਬਲੱਡ ਪ੍ਰੈਸ਼ਰ, ਸ਼ੂਗਰ, ਗੋਇਟਰ, ਗਲੂਕੋਮਾ ਅਤੇ ਉੱਚ ਕੋਲੇਸਟ੍ਰੋਲ ਦੇ ਇਲਾਜ ਲਈ ਵਰਤੀਆਂ ਜਾਣ ਵਾਲੀਆਂ ਦਵਾਈਆਂ 'ਤੇ ਪਾਬੰਦੀ ਲਗਾ ਦਿੱਤੀ ਹੈ। ਇਨ੍ਹਾਂ ਦੇ ਨਾਮ ਬੀਪੀ ਗ੍ਰਿਟ, ਮਧੂਗ੍ਰਿਟ, ਥਾਈਰੋਗ੍ਰਿਟ, ਲਿਪੀਡੋਮ ਅਤੇ ਆਈਗ੍ਰਿਟ ਗੋਲਡ ਹਨ।ਇਸ ਆਦੇਸ਼ 'ਚ ਅਥਾਰਟੀ ਨੇ ਪਤੰਜਲੀ ਨੂੰ ਫਾਰਮੂਲੇਸ਼ਨ ਸ਼ੀਟ ਅਤੇ ਲੇਬਲ 'ਚ ਬਦਲਾਅ ਕਰਨ ਤੋਂ ਬਾਅਦ ਪਾਬੰਦੀਸ਼ੁਦਾ ਦਵਾਈਆਂ 'ਤੇ ਮੁੜ ਮਨਜ਼ੂਰੀ ਲੈਣ ਲਈ ਕਿਹਾ ਹੈ। ਯਾਨੀ ਕੰਪਨੀ ਬਦਲਾਅ ਦੀ ਮਨਜ਼ੂਰੀ ਤੋਂ ਬਾਅਦ ਹੀ ਦੁਬਾਰਾ ਉਤਪਾਦਨ ਕਰ ਸਕੇਗੀ। ਅਥਾਰਟੀ ਨੇ ਕੰਪਨੀ ਨੂੰ ਗੁੰਮਰਾਹਕੁੰਨ ਇਸ਼ਤਿਹਾਰਾਂ ਨੂੰ ਤੁਰੰਤ ਹਟਾਉਣ ਲਈ ਕਿਹਾ ਹੈ। ਨਾਲ ਹੀ, ਭਵਿੱਖ ਵਿੱਚ ਇਜਾਜ਼ਤ ਮਿਲਣ ਤੋਂ ਬਾਅਦ ਹੀ ਕੋਈ ਵੀ ਇਸ਼ਤਿਹਾਰ ਚਲਾਉਣ ਦੀ ਸਲਾਹ ਦਿੱਤੀ ਗਈ ਹੈ। ਅਜਿਹਾ ਨਾ ਕਰਨ 'ਤੇ ਉਤਪਾਦਨ ਲਾਇਸੈਂਸ ਵਾਪਸ ਲੈਣ ਦੀ ਚਿਤਾਵਨੀ ਵੀ ਦਿੱਤੀ ਹੈ।ਕੰਪਨੀ ਤੋਂ ਇਕ ਹਫਤੇ 'ਚ ਜਵਾਬ ਵੀ ਮੰਗਿਆ ਗਿਆ ਹੈ।