ਦਲਜੀਤ ਕੌਰ ਭਵਾਨੀਗੜ੍ਹ
ਨਵੀਂ ਦਿੱਲੀ, 17 ਸਤੰਬਰ 2021: ਅੱਜ ਟਿੱਕਰੀ ਬਾਰਡਰ ਤੇ ਕਿਸਾਨ ਸੰਘਰਸ਼ ਮੋਰਚੇ ਚ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਡਕੌਂਦਾ ਦੇ ਲੁਧਿਆਣਾ ਅਤੇ ਬਰਨਾਲਾ ਜਿਲੇ ਦੇ ਸਾਰੇ ਬਲਾਕਾਂ ਦੀਆਂ ਪਿੰਡ ਇਕਾਈਆਂ ਦੇ ਅਹੁਦੇਦਾਰਾਂ ਦੀ ਵਧਵੀਂ ਮੀਟਿੰਗ ਖਾਲਸਾ ਏਡ ਦੇ ਦਫ਼ਤਰ 'ਚ ਜ਼ਿਲ੍ਹਾ ਪ੍ਰਧਾਨ ਮਹਿੰਦਰ ਸਿੰਘ ਕਮਾਲਪੁਰਾ ਅਤੇ ਦਰਸ਼ਨ ਸਿੰਘ ਉੱਗੋਕੇ ਦੀ ਪ੍ਰਧਾਨਗੀ ਹੇਠ ਹੋਈ।
ਮੀਟਿੰਗ ਚ ਵਿਸੇਸ਼ ਤੌਰ ਤੇ ਇਸ ਸਮੇਂ ਪੰਹੁਚੇ ਜਥੇਬੰਦੀ ਦੇ ਸੂਬਾਈ ਪ੍ਰਧਾਨ ਬੂਟਾ ਸਿੰਘ ਬੁਰਜ ਗਿੱਲ ਨੇ ਮੁੱਖ ਵਕਤਾ ਵਜੋਂ ਕਿਸਾਨ ਵਰਕਰਾਂ ਨਾਲ ਕਿਸਾਨ ਸੰਘਰਸ਼ ਦੀ ਮੋਜੂਦਾ ਦਸ਼ਾ ਤੇ ਦਿਸ਼ਾ ਬਾਰੇ ਖੁੱਲਾ ਸੰਵਾਦ ਰਚਾਇਆ। ਇਸ ਸਮੇਂ ਸਭ ਤੋਂ ਪਹਿਲਾਂ ਹੁਣ ਤਕ ਕਿਸਾਨ ਸੰਘਰਸ਼ ਚ ਸ਼ਹੀਦ ਹੋ ਗਏ ਸਮੁੱਚੇ ਸ਼ਹੀਦਾਂ ਨੂੰ ਦੋ ਮਿੰਟ ਦਾ ਮੋਨ ਧਾਰ ਕੇ ਸ਼ਰਧਾਂਜਲੀ ਭੇਟ ਕੀਤੀ ਗਈ।ਉਨਾਂ ਅਪਣੇ ਸੰਬੋਧਨ ਚ ਸੰਯੁਕਤ ਕਿਸਾਨ ਮੋਰਚੇ ਦੀ ਅਗਵਾਈ ਚ ਸਾਲ ਭਰ ਦੇ ਇਸ ਸ਼ਾਨਾਮੱਤੇ ਸੰਘਰਸ਼ ਚ ਹਰ ਪਿੰਡ ਵਲੋਂ ਨਿਭਾਏ ਰੋਲ ਦੀ ਸ਼ਲਾਘਾ ਕਰਦਿਆਂ ਕਿਸਾਨ ਵਰਗ ਚ ਉਸਰੀ ਜਮਾਤੀ ਏਕਤਾ, ਇਤਫਾਕ ਤੇ ਮੁਹੱਬਤ ਦੀ ਭਾਵਨਾ ਨੂੰ ਹੋਰ ਮਜਬੂਤ ਕਰਨ ਦਾ ਸੱਦਾ ਦਿੱਤਾ। (MOREPIC1)
ਸ੍ਰ. ਬੂਟਾ ਸਿੰਘ ਬੁਰਜ ਗਿੱਲ ਨੇ ਕਿਹਾ ਕਿ ਪੌਣੀ ਸਦੀ ਬਾਅਦ ਪੰਜਾਬੀਆਂ ਦੀ ਪਹਿਲਕਦਮੀ ਤੇ ਦੇਸ਼ ਭਰ ਚ ਮੋਜੂਦਾ ਲੁਟੇਰੇ ਸਾਮਰਾਜੀ ਕਾਰਪੋਰੇਟ ਪ੍ਰਬੰਧ ਦੀ ਖਸਲਤ ਤੋ ਲੋਕਾਂ ਨੂੰ ਜਾਣੂ ਕਰਾਉਣ ਚ ਕਾਮਯਾਬ ਹੋਏ ਹਾਂ। ਸਿਰਫ ਐਨਾ ਹੀ ਨਹੀਂ ਇਸ ਮਨੁੱਖ ਖਾਣੇ ਲੋਕ ਦੋਖੀ ਰਾਜਨੀਤਕ ਸਿਸਟਮ ਵਿਰੁੱਧ ਨਫਰਤ ਤਿੱਖੀ ਕਰਨ ਚ ਵੀ ਕਿਸਾਨ ਅੰਦੋਲਨ ਕਾਮਯਾਬ ਹੋਇਆ ਹੈ। ਐਨਾ ਹੀ ਨਹੀਂ ਦੂਨੀਆਂ ਭਰ ਦੇ ਇਨਸਾਫ ਪਸੰਦ ਲੋਕਾਂ ਦੀ ਆਸ ਦਾ ਕੇਂਦਰ ਇਕ ਲੁੱਟਰਹਿਤ ਸਮਾਜ ਦੀ ਸਿਰਜਣਾ ਦੀ ਉਮੀਦ ਨੂੰ ਪੈਂਦੇ ਬੂਰ ਵਜੋ ਇਕ ਨਵੇਂ ਉਭਾਰ ਦਾ ਮੁਨਾਰਾ ਵੀ ਇਹ ਅੰਦੋਲਨ ਬਣਿਆ ਹੈ। ਇਸ ਮਹਾਨ ਕਿਸਾਨ ਮਜ਼ਦੂਰ ਸੰਘਰਸ਼ ਦੀ ਸਭ ਤੋ ਵੱਡੀ ਪ੍ਰਾਪਤੀ ਇਹ ਹੈ ਕਿ ਅਸੀਂ ਪੰਜਾਬ ਸਮੇਤ ਕਈ ਸੂਬਿਆਂ ਚ ਟੌਲ ਪਲਾਜਿਆਂ, ਮਾਲਜ, ਰੇਲ ਪਾਰਕਾਂ ਸਮੇਤ ਦਿੱਲੀ ਬਾਰਡਰਾਂ ਤੇ ਸਾਲ ਭਰ ਤੋਂ ਕਾਬਜ ਹੋ ਕੇ ਬਰਾਬਰ ਦੀ ਮੁੱਢਲੀ ਸੱਤਾ ਖੜੀ ਕਰਕੇ ਭਾਜਪਾ ਹਕੂਮਤ ਨੂੰ ਅੰਦਰੋ ਪੂਰੀ ਤਰਾਂ ਹਿਲਾ ਕੇ ਰੱਖ ਦਿੱਤਾ ਹੈ।
ਉਨਾਂ ਕਿਹਾ ਕਿ ਦੇਸ਼ ਭਰ ਦੇ ਸਰਕਾਰੀ ਅਦਾਰਿਆਂ ਦਾ ਸੌਦਾ ਕਰਕੇ ਮੁਲਕ ਨੂੰ ਇਕ ਵੇਰ ਫਿਰ ਗੁਲਾਮ ਕਰਨ ਦੇ ਰਾਹ ਤੁਰੀ ਭਾਜਪਾ ਦੀ ਫਿਰਕੂ ਫਾਸ਼ੀਵਾਦੀ ਹਕੂਮਤ ਦਾ ਫਸਤਾ ਵੱਢਣਾ ਤੇ ਦੇਸ਼ ਦੀ ਕਿਰਤੀ ਜਮਾਤ ਨੂੰ ਇਕਜੁੱਟ ਤੇ ਜਥੇਬੰਦ ਕਰਨਾ ਸਾਡਾ ਮੁੱਖ ਨਿਸ਼ਾਨਾ ਹੋਣਾ ਚਾਹੀਦਾ ਹੈ। ਸਾਮਰਾਜੀ ਸੰਸਥਾਵਾਂ ਦੇ ਸਰਗਨੇ ਅਮਰੀਕਾ ਦੀ ਅਗਵਾਈ ਚ ਸੰਸਾਰ ਭਰ ਦੇ ਹਵਸੀ ਕਾਰਪੋਰੇਟ ਦੂਨੀਆਂ ਭਰ ਦੀ ਧਨ ਦੌਲਤ ਅਪਣੇ ਕਬਜੇ ਚ ਕਰਨਾ ਚਾਹੁੰਦੇ ਹਨ। ਦੇਸ਼ ਦੀ ਸਨਅਤੀ ਪੈਦਾਵਾਰ ਅਤੇ ਸਰਕਾਰੀ ਅਦਾਰਿਆਂ ਤੇ ਕੰਟਰੋਲ ਸਥਾਪਤ ਕਰਨ ਤੋਂ ਬਾਅਦ ਹੁਣ ਖੇਤੀ ਸੈਕਟਰ ਚੋਂ ਵੱਡੇ ਮੁਨਾਫੇ ਬਟੋਰਨ ਲਈ ਇਹ ਖੇਤੀ ਦੇ ਕਾਲੇ ਕਨੂੰਨ ਲੈ ਕੇ ਆਏ ਹਨ। ਸੰਯੁਕਤ ਕਿਸਾਨ ਮੋਰਚੇ ਦੀ ਲੀਡਰਸ਼ਿਪ ਨੇ ਲੱਖ ਔਕੜਾਂ ਦੇ ਬਾਵਜੂਦ ਇਸ ਇਤਿਹਾਸਕ ਸੰਘਰਸ਼ ਨੂੰ ਬੜੀ ਦਲੇਰੀ ਤੇ ਸੁਚੱਜਤਾ ਨਾਲ ਚਲਾਇਆ ਹੈ , ਇਸ ਸਿਆਣਪ ਤੇ ਹਿੰਮਤ ਨੂੰ ਹੋਰ ਮਜਬੂਤ ਕਰਨਾ ਇਸ ਅੰਦੋਲਨ ਦੀ ਅਣਸਰਦੀ ਲੋੜ ਹੈ।
ਇਸ ਮੌਕੇ ਜੱਥੇਬੰਦੀ ਦੇ ਸਮੂਹ ਕਾਰਕੁੰਨਾਂ ਨੇ ਵੀ ਅਪਣੇ ਵਿਚਾਰ ਤੇ ਸੁਝਾਅ ਰਖੇ ਅਤੇ ਕਈ ਨੁਕਤਿਆਂ ਦੀ ਸ਼ੰਕਾਨਿਵਰਤੀ ਕੀਤੀ। ਸਮੂਹ ਵਰਕਰਾਂ ਨੇ ਜਿਥੇ ਦਿਲੀ ਸੰਘਰਸ਼ ਮੋਰਚਿਆਂ ਤੇ ਗਿਣਤੀ ਤੇ ਅਨੁਸਾਸ਼ਨ ਵਧਾਉਣ ਦਾ ਵਚਨ ਦਿੱਤਾ ਊਥੇ ਪਿੰਡਾਂ ਚ 27 ਸਿਤੰਬਰ ਦੇ ਭਾਰਤ ਬੰਦ ਦੀ ਸਫਲਤਾ ਲਈ ਪੂਰਾ ਤਾਣ ਲਾਉਣ ਦਾ ਵੀ ਫੈਸਲਾ ਕੀਤਾ। ਲੰਮੇ ਸੰਘਰਸ਼ ਦੀ ਸਫਲਤਾ ਲਈ ਨਵੇ ਪਿੰਡਾਂ ਚ ਇਕਾਈਆਂ ਖੜੀਆਂ ਕਰਨ, ਪਹਿਲੀਆਂ ਇਕਾਈਆਂ ਨੂੰ ਮਜਬੂਤ ਕਰਨ, ਭਰਾਤਰੀ ਜਥੇਬੰਦੀਆਂ ਨਾਲ ਆਪਸੀ ਸਤਿਕਾਰ ਤੇ ਨੇੜਤਾ ਵਧਾਉਣ ਦਾ ਵੀ ਫੈਸਲਾ ਕੀਤਾ ਗਿਆ।
ਇਸ ਮੌਕੇ ਸੁਖਵਿੰਦਰ ਸਿੰਘ ਹੰਬੜਾ, ਜਗਤਾਰ ਦੇਹੜਕਾ, ਭੋਲਾ ਸਿੰਘ ਛੰਨਾਂ, ਕੁਲਵੰਤ ਸਿੰਘ ਭਦੌੜ, ਬਾਬੂ ਸਿੰਘ ਖੁੱਡੀਕਲਾਂ, ਸਰਬਜੀਤ ਸਿੰਘ ਧੂੜਕੋਟ, ਧਰਮ ਸਿੰਘ ਸੂਜਾਪੁਰ, ਤਾਰਾ ਸਿੰਘ ਅੱਚਰਵਾਲ, ਜਸਵਿੰਦਰ ਸਿੰਘ ਭਮਾਲ ਆਦਿ ਹਾਜ਼ਰ ਸਨ।
(advt52)