ਹੁਣ ਸੋਨੇ ਦੇ ਛੇ ਨੰਬਰਾਂ ਵਾਲੇ ਹਾਲਮਾਰਕ ਗਹਿਣਿਆਂ ਦੀ ਹੀ ਹੋਵੇਗੀ ਵਿੱਕਰੀ

ਨਵੀਂ ਦਿੱਲੀ: 4 ਮਾਰਚ, ਦੇਸ਼ ਕਲਿੱਕ ਬਿਓਰੋ

ਜੇਕਰ ਤੁਸੀਂ ਸੋਨਾ ਖ੍ਰੀਦਣ ਦਾ ਫੈਸਲਾ ਕਰ ਰਹੇ ਹੋ ਤਾਂ ਖਪਤਕਾਰ ਮੰਤਰਾਲੇ ਵੱਲੋਂ ਜਾਰੀ ਨਿਰਦੇਸ਼ਾਂ ਨੂੰ ਧਿਆਨ ਨਾਲ ਵਿਚਾਰਨਾ ਜ਼ਰੂਰੀ ਹੈ। ਯਾਦ ਰਹੇ ਕਿ 31 ਮਾਰਚ ਤੋਂ ਬਾਅਦ ਸਿਰਫ ਛੇ ਅੰਕਾਂ ਵਾਲੇ ਹਾਲਮਾਰਕ (HUID)ਵਾਲੇ ਸੋਨੇ ਦੇ ਗਹਿਣੇ ਅਤੇ ਹੋਰ ਕਲਾ ਕ੍ਰਿਰਤੀਆਂ ਦੀ ਹੀ ਵਿੱਕਰੀ ਹੋਵੇਗੀ।
ਖਪਤਕਾਰ ਮੰਤਰਾਲੇ ਨੇ ਕਿਹਾ ਕਿ ਇਹ ਫੈਸਲਾ 4 ਅਤੇ 6 ਅੰਕਾਂ ਦੇ ਹਾਲਮਾਰਕਿੰਗ ਦੇ ਉਲਝਣ ਨੂੰ ਲੈ ਕੇ ਲਿਆ ਗਿਆ ਹੈ। ਸੋਨੇ ਦੀ ਖਰੀਦੋ-ਫਰੋਖਤ ਦੇ ਬਦਲੇ ਹੋਏ ਨਿਯਮ ਮੁਤਾਬਕ ਹੁਣ ਸਿਰਫ 6 ਨੰਬਰਾਂ ਦੀ ਅਲਫਾਨਿਊਮੇਰਿਕ ਹਾਲਮਾਰਕਿੰਗ ਹੀ ਵੈਧ ਹੋਵੇਗੀ। ਜੇਕਰ ਇਸ ਨਵੇਂ ਹਾਲਮਾਰਕ ਤੋਂ ਬਿਨਾਂ ਸੋਨੇ ਦੇ ਗਹਿਣੇ ਵੇਚੇ ਜਾਂਦੇ ਹਨ, ਤਾਂ ਇਹ ਜਾਇਜ਼ ਨਹੀਂ ਹੋਵੇਗਾ। ਮੰਤਰਾਲੇ ਨੇ ਦੱਸਿਆ ਕਿ ਨਵੇਂ ਨਿਯਮ ਦੇ ਲਾਗੂ ਹੋਣ ਤੋਂ ਬਾਅਦ 4 ਅੰਕਾਂ ਵਾਲੇ ਹਾਲਮਾਰਕ ਵੀ ਪੂਰੀ ਤਰ੍ਹਾਂ ਬੰਦ ਹੋ ਜਾਣਗੇ।
ਸੋਨੇ ਜਾਂ ਇਸ ਤੋਂ ਬਣੇ ਕਿਸੇ ਵੀ ਤਰ੍ਹਾਂ ਦੇ ਗਹਿਣਿਆਂ ਦੀ ਪਛਾਣ ਕਰਨ ਲਈ, ਇਸ 'ਤੇ ਹਾਲਮਾਰਕ ਯੂਨੀਕ ਆਈਡੈਂਟੀਫਿਕੇਸ਼ਨ (ਐਚਯੂਆਈਡੀ) ਨੰਬਰ ਲਗਾਇਆ ਜਾਂਦਾ ਹੈ। ਇਹ HUID ਨੰਬਰ ਇੱਕ 6 ਅੰਕਾਂ ਦਾ ਅਲਫਾਨਿਊਮੇਰਿਕ ਕੋਡ ਹੁੰਦਾ ਹੈ। ਜਦੋਂ ਜੌਹਰੀ ਉਸ ਗਹਿਣਿਆਂ ਦੀ ਜਾਣਕਾਰੀ BIS ਪੋਰਟਲ 'ਤੇ ਅਪਲੋਡ ਕਰਦੇ ਹਨ, ਤਾਂ ਇਸ ਨੰਬਰ ਤੋਂ ਤੁਸੀਂ ਖਰੀਦੇ ਗਏ ਗਹਿਣਿਆਂ ਨਾਲ ਸਬੰਧਤ ਜਾਣਕਾਰੀ ਪ੍ਰਾਪਤ ਕਰ ਸਕਦੇ ਹੋ। ਸੋਨੇ ਦੀ ਧੋਖਾਧੜੀ ਦੇ ਮਾਮਲਿਆਂ ਨਾਲ ਨਜਿੱਠਣ ਲਈ ਅਜਿਹੇ ਕੋਡ ਬਹੁਤ ਪ੍ਰਭਾਵਸ਼ਾਲੀ ਹੁੰਦੇ ਹਨ।