ਨਵੀਂ ਦਿੱਲੀ, 10 ਫਰਵਰੀ, ਦੇਸ਼ ਕਲਿੱਕ ਬਿਓਰੋ :
ਮਹਿੰਗਾਈ ਦੇ ਦੌਰ ਵਿੱਚ ਮੁਸ਼ਕਿਲ ਨਾਲ ਜੀਵਨ ਬਤੀਤ ਕਰ ਰਹੇ ਲੋਕਾਂ ਉਤੇ ਹੋਰ ਬੋਝ ਪਵੇਗਾ, ਖਾਸ ਕਰਕੇ ਉਨ੍ਹਾਂ ਉਤੇ ਜਿੰਨਾਂ ਨੇ ਬੈਂਕਾਂ ਤੋਂ ਕਿਸੇ ਤਰ੍ਹਾਂ ਦਾ ਕਰਜ਼ਾ ਲਿਆ ਹੋਇਆ ਹੈ। ਜਨਤਕ ਖੇਤਰ ਦੀਆਂ ਦੋ ਬੈਂਕਾਂ ਵੱਲੋਂ ਹੁਣ ਲੋਨ ਵਿਆਜ਼ ਦਰਾਂ ਵਿੱਚ ਵਾਧਾ ਕੀਤਾ ਗਿਆ ਹੈ। ਪੰਜਾਬ ਨੈਸ਼ਨਲ ਬੈਂਕ (PNB) ਅਤੇ ਬੈਂਕ ਆਫ ਬੜੌਦਾ (BOB) ਵੱਲੋਂ ਵਿਆਜ਼ ਦਰਾਂ ਵਿੱਚ ਵਾਧਾ ਕੀਤਾ ਗਿਆ ਹੈ। ਪੀਐਨਬੀ ਨੇ ਕਰਜ਼ੇ ਉਤੇ ਲੱਗਣ ਵਾਲੇ ਵਿਆਜ਼ ਵਿੱਚ 0.25 ਫੀਸਦੀ ਤੱਕ ਵਾਧਾ ਕੀਤਾ ਹੈ। ਇੱਥੇ ਇਹ ਵੀ ਵਰਨਣਯੋਗ ਹੈ ਕਿ ਪਿਛਲੇ ਦਿਨੀਂ ਭਾਰਤੀ ਰਿਜਰਵ ਬੈਂਕ (ਆਰਬੀਆਈ) ਵੱਲੋਂ ਰੇਪੋ ਦਰਾਂ ਵਿੱਚ 0.25 ਫੀਸਦੀ ਵਾਧਾ ਕੀਤਾ ਗਿਆ ਸੀ, ਜਿਸ ਤੋਂ ਬਾਅਦ ਹੁਣ ਬੈਂਕਾਂ ਵੱਲੋਂ ਵਾਧਾ ਕੀਤਾ ਗਿਆ ਹੈ।
ਪੀਐਨਬੀ ਨੇ ਸ਼ੇਅਰ ਬਾਜ਼ਾਰ ਨੂੰ ਦਿੱਤੀ ਸੂਚਨਾ ਵਿੱਚ ਕਿਹਾ ਕਿ ਰੇਪੋ ਅਧਾਰਿਤ ਵਿਆਜ਼ ਦਰ (ਆਰਐਲਐਲਆਰ) 0.25 ਫੀਸਦੀ ਵਧਾਕੇ 8.75 ਫੀਸਦੀ ਤੋਂ 9.0 ਫੀਸਦੀ ਕਰ ਦਿੱਤੀ ਗਈ ਹੈ। ਜੋ ਤੁਰੰਤ ਪ੍ਰਭਾਵ ਨਾਲ ਲਾਗੂ ਹਨ।
ਬੈਂਕ ਆਫ ਬੜੌਦਾ ਨੇ ਸੀਮਾਂਤ ਲਾਗਤ ਵਿਆਜ ਦਰ (ਐਮਸੀਐਲਆਰ) ਵਿੱਚ 0.05 ਫੀਸਦੀ ਵਾਧਾ ਕੀਤਾ ਹੈ। ਐਮਸੀਐਲਆਰ 7.85 ਤੋਂ ਵਧਕੇ 7.90 ਫੀਸਦੀ ਹੋ ਗਈ। ਇਕ ਮਹੀਨੇ ਲਈ ਐਮਸੀਐਲਆਰ 8.15 ਫੀਸਦੀ ਤੋਂ ਵਧਕੇ 8.20 ਫੀਸਦੀ ਹੋ ਗਈ। ਬੈਂਕ ਨੇ ਸ਼ੇਅਰ ਬਾਜ਼ਾਰ ਨੂੰ ਸੂਚਨਾ ਦਿੱਤਾ ਹੈ ਕਿ ਨਵੀਆਂ ਦਰਾਂ 12 ਫਰਵਰੀ ਤੋਂ ਲਾਗੂ ਹੋਣਗੀਆਂ।